يوسف وروز جميع الفصول كاملة

_ماما انا وقعت دبلتي!

_ازاي ووقعت فين

_وانا بغسل المواعين وقعت ڠصب عني عشان واسعه ووقعت في الفتحه بتاعت الحوض

_طيب رني على ياسين عرفيه ولو زعل انا هبقا اجيب غيرها

_تمام

دخلت البلكونه رنيت عليه اكتر من مره ومردش في المره الاخيره كان رد بزعيق وهو بيقول:

_في أي يا روز رن رن رن مردتش يبقا مشغول افهمي بقا هفهمك لحد امتا

_ياسين انا بس كنت عايزه اقولك إن دبلتي وقعت مني

_انتي بتهزري ازاي تقع منك يعني ده إستهتار انتي واحده مستهتره وانا مش هجيب غيرها ولو جبت هتكون صيني

_وانا مش عايزه غيرها

قولتها وقفلت معاه ودخلت اوضتي اعيط فضلو يقولو خدي اللي يحبك متاخديش اللي بتحبيه ودي النتيجه!

تقريبآ حلاوة البدايات دي كل حاجه فيها بتكون مزيفه الضحكه الاهتمام الكلام الحلو ازاي الرجاله وحشين اوي لدرجة انهم يزيفو مشاعرهم!

بعد ما خلصت عياط فتحت الفيسبوك اقراء اسكريبت افصل بيه عن زعلي ووانا بقلب في الفيسبوك لقيت إعلان ل روف في وسط البلد اسمه "كرافتيد هوم"

حبيت الصور اللي في المكان وقرارت اني هلبس وانزل اشم هوا وافصل من كل حاجه شويه

قومت لبست الجيبه الي طالعه تريند جيبة عباد الشمس اللي فيها ورد ابيض كتير دي وعليها بلوزه سوده وطرحه بيضه والقليل من الميكب كنت جميله برغم دموع عيني اللي خبيتها ب الميكب وقبل ما انزل رنيت عليه عشان اعرفو اني نازله رد عليا وهو بيقول:

_خير يا روز وقعتي اي تاني؟

_موقعتش حاجه انا نازله

_لاء مفيش نزول

_محتاجه اخرج عايزه اشم هوا

_لاء قولت لاء

_تمام سلام

قولتها وقفلت معاه وطبعآ هنزل من وقت ما اتخطبت ليه وانا حاسه كأني عصفوره كانت على الشجره وهو خد العصفوره دي حطها في قفص